İran XİN: Üçüncü ölkələrin Xəzər dənizində hərbi mövcudluğu regionun maraqlarına ziddir

İranın xarici işlər naziri Hüseyn Əmir Abdullahiyan üçüncü ölkələrin Xəzər dənizində hərbi mövcudluğunu təmin etmək səylərini regionun maraqlarına zidd adlandırıb.

"Birxeber.Az"un məlumatına görə, o, belə bir bəyanatla Türkmənistanın xarici işlər naziri Rəşid Meredovla danışıqlarda çıxış edib.

“Əmir Abdullahyan bəzi üçüncü ölkələrin Xəzər dənizində hərbi mövcudluğunu təmin etmək üçün hərəkətlərini regionun maraqlarına zidd adlandırıb”, - İran Xarici İşlər Nazirliyinin teleqram kanalında yayımlanan bəyanatda deyilir.

İran Xarici İşlər Nazirliyinin rəhbəri üçüncü Xəzər İqtisadi Forumunun Xəzər beşliyi ölkələrinin - Azərbaycan, İran, Qazaxıstan, Rusiya və Türkmənistanın hökumət başçıları səviyyəsində keçirilməsi təklifi ilə də çıxış edib. Bundan əvvəlki forum 2022-ci il oktyabrın 5-6-da Moskvada keçirilib.