Bakıda Hindistanın Respublika Günü qeyd olunub - FOTO

Bakıda Hindistanın 75-ci Respublika Günü qeyd olunub.

APA xəbər verir ki, tədbirdə xarici işlər nazirinin müavini Elnur Məmmədov, diplomatik korpusun nümayəndələri və digər rəsmi qonaqlar iştirak edib.

Açılış nitqi ilə çıxış edən Hindistanın ölkəmizdəki səfiri Sridharan Madhusudhanan Azərbaycanda iqtisadiyyatın şaxələndirilməsinə və dayanıqlılığa önəm verdiklərini bildirib:

“Ölkələrimiz arasında ikitərəfli ticarət əlaqələrimiz güclüdür, Hindistan Azərbaycanın ilk 7 ticarət tərəfdaşı sırasındadır”.

Səfir Azərbaycan və Hindistan arasındakı dostluq münasibətindən məmnunluğunu ifadə edib.

Xarici işlər nazirinin müavini Elnur Məmmədov da, öz növbəsində, Azərbaycan və Hindistan arasındakı qarşılıqlı münasibətdən danışıb.

Nazir müavini bir həftə əvvəl iki ölkənin xarici işlər nazirlərinin görüşünə toxunub: “İki ölkə arasında qeyri-neft sektoru üzrə sahələrdə əməkdaşlığı artırmaq mümkündür. Azərbaycan və Hindistan regionda nəqliyyat kommunikasiya əlaqələrinin inkişafında maraqlıdır”.

Nitqlərdən sonra iki diplomat arasında xatirə mübadiləsi olub.

Rəsmilərin çıxışlarının ardından ziyafətin bədii hissəsi nümayiş olunub.