Dövlət Xidməti "Whatsapp+"la bağlı məsələyə aydınlıq gətirib

Dövlət Xidməti "Whatsapp+"la bağlı məsələyə aydınlıq gətirib

Elektron Təhlükəsizlik Xidməti tərəfindən aparılan araşdırmalar nəticəsində vətəndaşların üzləşdiyi maliyyə itkisinin və cihazlarının zərərverici proqramlarla yoluxmasının əsas səbəbinin “WhatsApp+” və bunun kimi rəsmi müəllifi tərəfindən yayımlanmayan, eləcə də etibarlı mənbələrdən yüklənilməyən tətbiqlər nəticəsində baş verdiyi müəyyən olunub.

Bu barədə Elektron Təhlükəsizlik Xidmətindən “Birxeber.Az-Economics”in sorğusuna cavab olaraq bildirilib.

Dövlət xidmətindən verilən məlumatda qeyd olunub ki, kiberdələduzlar belə tətbiqlər vasitəsilə vətəndaşların fərdi məlumatlarını oğurlamaq və cihazlarından növbəti kiberhücumları həyata keçirmək məqsədilə istifadə edir.

“Elektron Təhlükəsizlik Xidməti vətəndaşları bu kimi hallara qarşı diqqətlə yanaşmağa çağırır. ETX vətəndaşlara cihazlarına tətbiqləri yalnız rəsmi mənbələrdən yükləməyi, tətbiqləri yükləyərkən onlara verilən icazələri mütləq qaydada nəzərdən keçirməyi tövsiyə edir”, - deyə qeyd olunub.

Qeyd edək ki, bir neçə gündür sosial şəbəkələrdə “Whatsapp+” istifadəçilərinin bank hesablarının ələ keçirilməsi kimi məlumatlar yayılıb.