Füzuliyə qayıdan məcburi köçkün: “Böyük sevinc içindəyik”

Füzuliyə qayıdan məcburi köçkün: “Böyük sevinc içindəyik”

“Otuz ildən sonra Füzuliyə qayıdırıq. Böyük sevinc içindəyik”.

“Birxeber.Az” xəbər verir ki, bunu bu gün Füzuliyə köçən keçmiş məcburi köçkün Səməd Babayev jurnalistlərə deyib.

“Allah bizə bu günü nəsib etmiş şəhidlərimizə rəhmət eləsin, qazilərimizə can sağlığı versin. Uca tanrı Prezidentimizə uzun ömür versin”, - qeyd edib.

S.Babayev bildirib ki, o, Füzulini hələ gənc yaşlarında tərk etməyə məcbur olub.

“Doğma yurdumu 18 yaşımda tərk etmək məcburiyyəti ilə üzləşmişdim. Abşeron rayonunun Ceyranbatan qəsəbəsində məskunlaşmışdıq. Çox sevinirəm ki, Füzuliyə qayıdıram”, - keçmiş məcburi köçkün əlavə edib.

Qeyd edək ki, bu gün Füzuli şəhərinə daha 34 ailə yola salınıb. Bakının Qaradağ rayonunun Lökbatan qəsəbəsində məcburi köçkünlər üçün salınmış “Qobupark-3” yaşayış kompleksində 123 nəfərdən ibarət növbəti köç karvanı yola düşüb.

Bununla da Füzuli şəhərində ümumilikdə 596 ailənin (2 245 nəfər) daimi məskunlaşması təmin ediləcək.

Qeyd edək ki, Füzuliyə sonuncu köç karvanı martın 15-də baş tutub. Həmin mərhələdə şəhərə daha 35 ailə - 153 nəfər köçürülüb və onlara mənzillərin açarları təqdim olunub. Ailələr Füzuli şəhərində yenidən tikilən evlərdə məskunlaşıblar.