Qarabağda inşa ediləcək su anbarının tikintisilə bağlı planlar dəqiqləşdirilib

Qarabağda inşa ediləcək su anbarının tikintisilə bağlı planlar dəqiqləşdirilib

Ümumi su tutumu 70,5 milyon kubmetr olan "Bərgüşadçay" su anbarının Qubadlı rayon mərkəzindən yuxarıda Bəxtiyarlı kəndi yaxınlığında yerləşməsi nəzərdə tutulub.

Bu barədə “Report”a açıqlamasında Dövlət Su Ehtiyatlar Agentliyinin tabeliyindəki "Azərbaycan Meliorasiya və Su Təsərrüfatı" ASC-nin İnvestisiyalar və layihələrin idarə olunması şöbəsinin müdiri Çingiz Abbasov deyib.

“Su anbarı vasitəsilə Qubadlı rayonu ərazisində 12 min hektar əkin sahələrinin suvarma suyu ilə təmin edilməsinə zəmin yaranacaq, uzunluğu 61,5 kilometr olan magistral boru kəməri vasitəsilə isə "Qız Qalası" hidroqovşağından su götürəcək magistral kanalın qidalandırılması üçün saniyədə 12 kubmetr suyun verilməsi mümkün olacaq”, - Ç. Abbasov bildirib.

Onun sözlərinə görə, layihə çərçivəsində həmçinin bəzi rayonların içməli su ilə təchizatı nəzərdən keçirilir.

“Bərgüşadçay" su anbarından ayrılan magistral boru kəməri üzərində ümumi gücü 36 MVt olan 3 ədəd su elektrik stansiyasının qurğularının tikintisi nəzərdə tutulur. Tələb olunan həcmi, bəndin hündürlüyü, topoqrafik və geoloji şərait nəzərə alınmaqla ən optimal variant olaraq bəndin Bərgüşad çayı üzərində Qubadlı rayon mərkəzindən yuxarıda Bəxtiyarlı kəndi yaxınlığında tikintisi məqsədəuyğun hesab edilib", - Ç. Abbasov vurğulayıb.