İngiltərəli futbolçunun yığmanın düşərgəsindən ayrılmasının səbəbi açıqlanıb

"Arsenal"ın futbolçusu Ben Uaytın Qətərdəki dünya çempionatı zamanı İngiltərə millisinin düşərgəsini tərk etməsinin səbəbi bəlli olub.

"Birxeber.Az" “Daily Star”a istinadən xəbər verir ki, 25 yaşlı müdafiəçi baş məşqçi Qaret Sautgeytin köməkçisi Stiv Hollandla münaqişə səbəbindən cəzalandırılıb.

İddiaya görə, onlar ABŞ-la qolsuz heç-heçə etdikləri qrup mərhələsi matçından əvvəl kollektivin önündə mübahisə ediblər. Daha sonra Uaytın turnirdə iştirakdan uzaqlaşdırılması ilə bağlı qərar qəbul edilib.

İngiltərə futbol Assosiasiyası futbolçunun şəxsi məsələlərə görə komandadan ayrıldığını bildirib.

Qeyd edək ki, İngiltərə millisi DÇ-2022-nin 1/4 final mərhələsində dekabrın 10-da Fransa yığması ilə üz-üzə gələcək.