"Sabah"ın U-9 komandasının baş məşqçisi: Meydança böyük idi, qapıçımız bəzən görünmürdü

Bakıdakı meydança buradakının üçdə biridir. Məsafə, qapılar fərqlidir. Qapıçımız bəzən qapıda görünmürdü.

Bunu "Report"a açıqlamasında "Sabah"ın U-9 komandasının baş məşqçisi Məhərrəm Müslümzadə Belarusun paytaxtı Minskdə iştirak etdikləri “Bizim gələcəyimiz” beynəlxalq turniri barədə danışarkən deyib.

Mütəxəssis yarışla bağlı təəssüratlarının çox yaxşı olduğunu bildirib: "Həqiqətən maraqlı turnir təşkil etmişdilər. Klub rəhbərliyinə də bizi bu cür yarışlara göndərdikləri üçün təşəkkür edirik. U-8 və U-9 təməl yaş qruplarıdır. Komanda 4 aydır birlikdədir, oktyabrda yığışmışıq. Buna baxmayaraq, düzgün işlər görülür. Turnirin səviyyəsi yüksək idi, gərgin qarşılaşmalar oldu. "Zenit", "Krasnodar", "Dinamo" (Minsk) kimi güclü akademiyalar var idi. Məşqçilər və uşaqlar üçün çox böyük təcrübə oldu. Çatışmazlıqları və onlardan nədə geri qaldığımızı gördük".

Müslümzadə bir gündə üç matç oynadıqlarını söyləyib: "Buna uşaqların gücü çatmadı. Ən böyük yaralı yerimiz reqlametin fərqli olması idi. Yerlə göy qədər fərq var. Rəqiblərimiz indidən böyük meydanı hiss edirlər. Buna baxmayaraq, əlimizdən gələnin ən yaxşısını etməyə çalışdıq. Komandamdan, oyunumuzdan elə də narazı qalmadım. "Zenit"i məğlub etmək şansımız da oldu. Görüşün birinci hissəsində heç-heçə oynadıq, 3 qol imkanından yararlana bilmədik. Sadəcə, matçların ikinci hissələrində gücümüz çatmadı. Rəqiblər artıq bu meydançaya və digər məsələlərə öyrəşib. Biz çox böyük təcrübə qazandıq. Hər şey qənaətbəxş idi, gələcəyə ümidlə baxırıq. Ən azından bu səviyyəni gördük. Çatışmazlıqları aradan qaldırmağa çalışacağıq".

Qeyd edək ki, "Sabah”ın U-9 komandası turnirdə Belarusun BATE, “Minsk”, “Start” (Minsk), həmçinin Rusiyanın “Zenit” komandaları ilə birlikdə A qrupunda yer alıb. “Sabah” qrup mərhələsində BATE (5:4) və “Start”ı (4:0) məğlub edib, “Minsk” (0:3) və “Zenit”ə (0:2) məğlub olub. Komanda qrup mərhələsini 3-cü pillədə başa vurub.

Məhərrəm Müslümzadənin yetirmələri 9-12-ci yerlər uğrunda mübarizədə Rusiyanın “Nijni-Novqorod” (0:3) və Belarusun “Volqa Brest” (2:4) ilə qarşılaşıblar.