Serbiyalı politoloq: Aİ Serbiyaya seçkilərə görə təzyiqlərini davam etdirir

Serbiya hökuməti yeni etirazların qarşısını almaq üçün Belqradda təkrar bələdiyyə seçkilərinin keçirilməsinə razılıq verib.

Bu barədə “Birxeber.Az”a açıqlamasında serbiyalı politoloq Oqnen Qoqiç bildirib.

Ekspert qeyd edib ki, Qərb böyük ehtimalla Serbiya hökumətinə siyasi təzyiqlərini davam etdirəcək:

“Deyə bilərəm ki, həm ölkə daxilində, həm də xaricdən – Avropa İttifaqı (Aİ) tərəfindən birgə təzyiqlər göstərilir. Komissiyalar çağırılıb, araşdırmalar aparılıb, hesabatlar hazırlanıb və s. Onlar (Aİ) Belqradda keçirilmiş seçkilərə tənqidi yanaşıblar”.

Xatırladaq ki, Serbiya müxalifətinin etirazlarından sonra hakim Serb Tərəqqi Partiyası bələdiyyə seçkilərinin təkrar keçiriləcəyini elan edib.

Ekspertin fikrincə, bu yolla hakim partiya həm Serbiya müxalifətinin, həm də Aİ-nin təmsil etdiyi beynəlxalq ictimaiyyətin tələblərini təmin etməyə çalışır.

O, hakim partiyanın hakimiyyətini qoruyub saxlayacağına əmindir, çünki müxalifət 2023-cü ilin dekabrında keçirilmiş parlament seçkilərinin nəticələrinə artıq etiraz etmir:

“Burada söhbət Serbiyada hökumətin qurulub-qurulmayacağından getmir. Əlbəttə ki, hökumət formalaşdırılacaq. Söhbət hazırda paytaxt Belqradda növbədənkənar bələdiyyə seçkilərindən gedir”.

O.Qoqiçin fikrincə, qarşıdan gələn seçkilərin nəticəsini müəyyən etmək çətindir, çünki müxalifət üstünlük qazana bilər:

“Xarici siyasətə gəlincə, Serbiya Prezidenti siyasi balans məsələsində uğur qazanıb. Mənə elə gəlir ki, beynəlxalq ictimaiyyətdə məhz onun Serbiyaya lazım olması ilə bağlı konsensus var”.

Ekspert əlavə edib ki, ölkənin xarici siyasətində dəyişikliyin olacağını gözləməyə dəyməz.