NYT: Trampın namizədliyi ABŞ üçün faciədir

NYT: Trampın namizədliyi ABŞ üçün faciədir

ABŞ-nin keçmiş lideri Donald Trampın Respublikaçı Partiyadan ABŞ prezidentliyinə namizəd kimi irəli sürülməsi bütün ölkə üçün faciədir.

“Report” xəbər verir ki, bu qənaətə ölkənin “The New York Times” qəzetinin “super çərşənbə axşamı”nda Amerikanın 15 ştatında keçirilmiş ilkin seçkilərin (praymerizlərin) və respublikaçıların partiya fəallarının yığıncaqlarının (kokus) sonuclarına dair redaksiya məqaləsində gəlinib.

Donald Trampın çərşənbə axşamı əldə etdiyi qələbələr onu Respublikaçı Partiyanın prezidentliyə namizədliyini qazanmaq üçün lazım olan 1 215 nümayəndə eşiyinə yaxınlaşdırdı <...> Partiya Trampın ambisiyaları üçün bir alətə çevrilib və o, üçüncü dəfə onun bayraqdarı olacağına, demək olar ki, əmindir. Bu, Respublikaçı Partiya və [partiyanın] xidmət etməli olduğu ölkə üçün üçün faciədir”, – məqalədə qeyd olunub.

Qəzet nəql edib ki, Respublikaçı Partiya öz öhdəliklərindən çəkilib və “vicdan, prinsiplər, siyasət, vətənpərvərlik də daxil olmaqla, hər şeyin bahasına müəyyən bir şəxsin seçilməsinə həsr olunmuş bir təşkilata” çevrilib.

“Partiya Ukraynanı dəstəkləmək sözlərindən və Avropadakı NATO müttəfiqlərimizin təhlükəsizliyinə sadiqliyindən imtina etməyə hazır görünür. Tramp NATO ölkələrini ödəniş etməyə məcbur edəcəyini deyəndə və ya Rusiyanı onlarla “istədiyini etməyə” təşviq edəcəyi ilə hədələdikdə, bir çox respublikaçı liderlər bu barədə söz açmayıblar”, – qəzetin redaksiya şurası vurğulayıb.

Xatırladaq ki, martın 5-də Tramp Alabama, Alyaska, Arkanzas, Virciniya, Kaliforniya, Kolorado, Massaçusets, Minnesota, Men, Oklahoma, Şimali Karolina, Tennessi, Texas və Yuta ştatlarında ABŞ-nin BMT-dəki keçmiş daimi nümayəndəsi Nikki Heylini məğlub edib. Heyli ondan yalnız Vermontda üstün olub. “Super çərşənbə axşamı”ndan Heyli mübarizədən çəkildiyini açıqlayıb. Tramp isə partiyadaşının tərəfdarlarını seçkidə onu dəstəkləməyə çağırıb.