Polşalı fermerlər Baş nazirin ofisinin və parlamentin qarşısında aksiya keçiriblər

Minlərlə polşalı fermer bu gün ölkənin paytaxtı Varşavada baş nazir Donald Tuskun ofisi qarşısında etiraz aksiyası keçirib.

APA "Reuters"ə istinadən xəbər verir ki, fermerlər binanın qarşısında avtomobil şinlərini yandırıb və binaya tərəf pirotexnik qurğular atıblar.

Polşalı fermerlər ucuz idxalın (əsasən Ukraynadan kənd təsərrüfatı məhsulları - red.) və onların dolanışığına zərər verdiyini iddia etdikləri ekoloji qaydaların ("Green Deal" -red) dayandırılmasını tələb edirlər.

Etirazçı fermerlərin bir qismi isə parlament binasının qarşısına doğru yürüş ediblər. Parlament binası qarşısında etiraz edən fermerlərlə polis arasında toqquşma olub, polis etirazçılara qarşı bibər qazından istifadə edib və bəzi iştirakçıları təhlükəsizlik qüvvələrinə qarşı zorakılıqda ittiham edib.

"Etiraz edənlərin bəzilərinin polis əməkdaşlarına qarşı fiziki təcavüzü səbəbindən birbaşa məcburi tədbirlərdən istifadə etmək lazım idi", - Varşava polisi "X" hesabında yazıb.

Qeyd edək ki, artıq bir neçə aydır ki polşalı fermerlər etiraz aksiyaları keçirirlər.