Nazir: Qızılcaya görə məktəblərin bağlanması gündəmdə deyil

Nazir: Qızılcaya görə məktəblərin bağlanması gündəmdə deyil

Qızılca ilə bağlı çox suallar olur. Burada Elm və Təhsil Nazirliyini maraqlandıran məsələ təhsil müəssisələrinin fəaliyyəti ilə bağlıdır.

APA xəbər verir ki, bunu elm və təhsil naziri Emin Əmrullayev brifinqdə bildirib.

“Son aylar ərzində yoluxmanı izləyirik, müvafiq dövlət qurumları ilə əməkdaşlıq edirik. Məktəblərin fəaliyyətini dayandırması və ya onlayn olması məqsədəmüvafiq deyil. Təhlillər göstərir ki, azyaşlı uşaqlar arasında istər yoluxma, istərsə də az sayda ölüm halı olması digər xəstəliklərlə bağlıdır. Peyvəndləmənin statistikası dəyişmirsə, məktəbi bağlamağa ehtiyac yoxdur, sadəcə məktəbi bağlayıb uşaqları təhsildən uzaqlaşdırmış olarıq. Uşaqlara vaxtında peyvəndləmə olmadıqda bir neçə ildən sonra belə reallıqla üz-üzə qalırıq. Ümumi təhsil müəssisələrində qızılca xəstəliyinə yoluxma kütləvi xarakter daşımır və məktəblərin bağlanması gündəmdə deyil”, – nazir deyib.

O əlavə edib ki, məktəblərdə müvafiq ehtimallar nəzərə alınaraq nəzarət gücləndirilib, pedaqoji kollektivə şagirdlərin səhhətində müşahidə oluna biləcək hər hansı narahatlıq halları ilə bağlı daha diqqətli olmaları tövsiyə edilib: "Valideynlərə hər zaman məsləhət görülür ki, övladları mövsümi xəstəliklərə və virus infeksiyalarına yoluxduğu halda, tam sağalanadək digər uşaqlarla yaxın təmasda olmasınlar. Övladlarınızın peyvənd olunmasını tövsiyə edirik".