Dövlət Xidməti: Rəqabət Məcəlləsi sahibkarlar üçün geniş imkanlar yaradacaq

Rəqabət Məcəlləsi sahibkarların sağlam rəqabət şəraitində fəaliyyəti üçün bütün hüquqi çərçivə və iqtisadi əsasları müəyyənləşdirir.

“APA-Economics” xəbər verir ki, bunu prezident İlham Əliyevin təsdiqlədiyi və 2024-cü ilin 1 iyul tarixindən qüvvəyə minəcək Rəqabət Məcəlləsini şərh edərkən İqtisadiyyat Nazirliyi yanında Antiinhisar və İstehlak bazarına Dövlət Nəzarət Xidmətinin şöbə müdiri Xamis Seyranov deyib.

O bildirib kİ, bu məcəllənin qəbul edilməsi ilə iqtisadi tənzimlənmədə səmərəlilik yüksələcək: “ Rəqabət Məcəlləsinin tətbiqi bazarlara giriş maneəsinin aradan qaldırılmasını təmin edəcək, mikro, kiçik və orta sahibkarlığın inkişafına töhfə verəcək. Bazarda rəqabət mühiti və azad rəqabət şəraitinin formalaşması bazar iştirakçılarının sayının çoxalmasına, yerli təsərrüfat subyektlərinin daxili və xarici bazarlarda rəqabət qabiliyyətinə imkan verəcək. Rəqabət mühitinin formalaşdırılması eyni zamanda özəl sektor tərəfindən innovasiya fəaliyyətinin və rəqəmsallaşmanın tətbiqinin genişləndirilməsinə, bu çərçivədə yeni alətlərin tətbiqinə imkan yaradacaq”.

X. Seyranov həmçinin əlavə edib ki, Rəqabət Məcəlləsi işğaldan azad olunan ərazilərin bərpası və yenidən qurulması prosesində də özəl sektorun inkişafını sürətləndirəcək. Bu məcəllənin tətbiqi ilə sosial rifahın yüksəldilməsi üçün də yeni impulslar müəyyənləşdirilir. Belə ki kiçik vıə orta sahibkarlıq subyektlərinin kəmiyyəti və sayının artması yeni iş yerlərinin yaranmasına ciddi təkan verəcək, məhsul və xidmətlərin çeşidliliyi üçün seçim imkanı yaradacaq.

"Həmçinin istehsalın və təklifin artması qiymətlərin azalmasına səbəb olacaq. Bu məcəllə əsassız qiymət artımı ilə mübarizədə əsas alət olacaq və bununla da qiymətlərin optimallaşdırılması üçün imkan yaranacaq. Ədalətli rəqabət məhsul və xidmətlərin sayı, keyfiyyətini yüksəldəcək. Nəticə etibarı ilə istehlakçı hüquqlarınınm müdafiəsi daha da gücləndiriləcək” - deyə şöbə müdiri vurğulayıb.

Qeyd edək ki, Rəqabət Məcəlləsi ölkəmizdə rəqabət mühitinin təmin edilməsi və haqsız rəqabətin aradan qaldırılması üçün hüquqi çərçivənin müəyyən edilməsi məqsədilə hazırlanıb. Məcəllə “Antiinhisar fəaliyyəti haqqında”, “Haqsız rəqabət haqqında”, “Təbii inhisarlar haqqında” Azərbaycan Respublikasının Qanunları və digər normativ hüquqi aktları özündə ehtiva edir.

Milli Məclisin dekabrın 8-də keçirilən plenar iclasında “Azərbaycan Respublikası Rəqabət Məcəlləsinin təsdiq edilməsi haqqında” Qanun III oxunuşda qəbul edilib.

“Azərbaycan Respublikası Rəqabət Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” Qanun 23 yanvar 2024-cü il tarixində Azərbaycan Respublikasının Prezidenti İlham Əliyev tərəfindən imzalanıb.