S&P Azərbaycanda iqtisadi artım proqnozunu yaxşılaşdırıb

“S&P Global” Beynəlxalq Reytinq Agentliyi 2022-ci ildə Azərbaycanın ÜDM artımının 4% səviyyəsində olacağını proqnozlaşdırır.

"Birxeber.Az" xəbər verir ki, bu barədə reytinq agentliyinin "2022-ci ilin 4-cü rübü üçün EMEA regionunda maliyyə institutlarının monitorinqi: Yeni sarsıntılar yeni çətinliklər gətirir" başlıqlı hesabatında deyilir.

S&P iyul ayı proqnozunda Azərbaycanda 2022-ci il üzrə iqtisadi artımın 3,5% səviyyəsində olacağını pronozlaşdırırdı ki, bu da əsasən qaz hasilatının artımını, qeyri-neft sektorunda canlanmanı və neft hasilatının cüzi azalmasını əks etdirir: "2023-2025-ci illər arasında orta artımın 1%-dən bir qədər çox olacağını gözləyirik, belə ki, yeni qaz ixracı imkanları neft sektorunda tədricən azalmanı qismən kompensasiya edir”.

Bununla belə, yenilənmiş proqnozda 2023 və 2024-cü illərdə ÜDM-in artım tempi 1,5%, 2025-ci ildə isə 1% səviyyəsində müəyyən edilib.

Hesabata görə, Azərbaycan, Qazaxıstan və Fars körfəzi ölkələrinin Əməkdaşlıq Şurasına üzv neft hasil edən inkişaf etməkdə olan bazarlar enerji qiymətlərinin mövcud dinamikasından faydalana bilər.

“Maliyyələşdirmə şərtlərinin sərtləşdirilməsi, Çində artımın zəifləməsi, Avropada iqtisadi perspektivlərin pisləşməsi və ABŞ-da gözləniləndən daha dərin resessiya EMEA regionunun inkişaf etməkdə olan bazarlarını çətin dövrlərin gözlədiyinə işarə edir.

Artan inflyasiya və beynəlxalq borclanmanın dəyərinin artması Türkiyə kimi xarici maliyyələşdirmədən asılı olan bazarların həssaslığını artıracaq”, - hesabatda deyilir.

Eyni zamanda, S&P hesab edir ki, iri xammal ixracatçıları, xüsusən də neft-qaz sektorundan əhəmiyyətli gəlir əldə edən ölkələr cari qiymət tendensiyalarından faydalana bilər.

“Eyni şəkildə, Rusiya-Ukrayna münaqişəsi başlayandan sonra bəzi qonşu ölkələrin insan və kapital axınından və regionda ticarət axınının yönləndirilməsindən faydalandığını müşahidə etdik. Bu, münaqişə ilə bağlı narahatlıqlar və Rusiyaya tətbiq edilən sanksiyalar, eləcə də bir çox müəssisələrin münaqişənin əvvəlindən Rusiyanı tərk etmək qərarına gəlməsi səbəbindən baş verib”, - agentliyin analitikləri hesab edirlər.

S&P yaxın 1-2 il ərzində Avropada makroiqtisadi vəziyyətin daha da çətinləşəcəyini proqnozlaşdırır.

"Davam edən enerji qiymətləri böhranını nəzərə alaraq, biz azalma risklərinin artacağını gözləyirik. Rusiya Ukrayna ilə hərbi münaqişədə irəliləyişin olmamasını əsas enerji təchizatçısı kimi mövqeyini gücləndirməklə kompensasiya edir ki, bu da Avropada inflyasiyaya təkan verir. Hökumətlər artan inflyasiya təzyiqlərini nəzərə almaqla istehlakçılara və bizneslərə dəstək tələbləri ilə üzləşir. Maliyyələşdirmə şərtlərinin sərtləşdirilməsi daha həssas iqtisadiyyatları və zəif oyunçuları sarsıdaraq problemi daha da gücləndirə bilər. Artan inflyasiyanın və aşağı iqtisadi artımın uzun müddət davam etməsi maliyyə institutları üçün riskləri artıracaq", - hesabatda deyilir.